Hymnus
Te, splendor et virtus Patris, Te vita, Iesu, córdium, Ab ore qui pendent tuo, Laudámus inter Angelos.
Tibi mille densa míllium Ducum coróna mílitat ; Sed éxplicat victor Crucem Míchaël salútis sígnifer.
Dracónis hic dirum caput In ima pellit tártara, Ducémque cum rebéllibus Cælésti ab arce fúlminat.
Contra ducem supérbiæ Sequámur hunc nos príncipem, Ut detur ex Agni throno Nobis coróna glóriæ.
Deo Patri sit glória, Qui, quos redémit Fílius, Et Sanctus unxit Spíritus, Per Angelos custódiat. Amen.